पवित्र स्मृती
विश्वनाथ बाबा हे नाथ नंगे महाराजांचे परमशिष्य म्हणून भक्तपरंपरेत स्मरणात आहेत. मंदिर परिसरातील त्यांचे समाधी मंदिर, पादुका आणि उपलब्ध धार्मिक स्मृती भाविकांसाठी श्रद्धेचा विषय आहेत.
डव्हा गावामध्ये विस्तीर्ण प्रांगणामध्ये नाथ नंगे महाराज संस्थान वसलेले आहे. या प्रांगणात प्रवेश करताच सुरुवातीलाच डाव्या बाजूस विश्वनाथ बाबा समाधी मंदिर आहे. आधुनिक बांधकाम साहित्याचा वापर करून हे मंदिर बांधलेले आहे. मंदिराचा सभामंडप प्रशस्त आहे. समोरच गर्भगृह आहे. त्यास सभामंडपातून प्रदक्षिणा मार्ग आहे.
सभामंडपातील खांबांवर आणि भिंतीवर अनेक जुनी छायाचित्रे लावण्यात आली आहेत. मंदिराच्या उभारणीपासून ते मंदिराचे काम पूर्ण झाल्यानंतर राष्ट्रसंत तुकडोजी महाराज व अन्य महत्त्वाच्या व्यक्तींकडून दिल्या गेलेल्या भेटी, साजरे केलेले उत्सव यांचा त्यात समावेश आहे. सभामंडपात मागच्या बाजूला छोट्या देवळीमध्ये विश्वनाथ महाराज यांच्या मातोश्री मायाबाई यांचे छायाचित्र आहे.
गर्भगृहात उंच संगमरवरी चौथऱ्यावर चांदीच्या अधिष्ठानावर विश्वनाथ महाराजांची मूर्ती प्रतिष्ठापित आहे. मूर्तीच्या मस्तकी चांदीचा मुकुट आहे. मागे कोरीव नक्षीकाम केलेली चांदीची प्रभावळ आहे. मूर्तीसमोर महाराजांच्या चांदीच्या पादुका आहेत. या मागे भिंतीवर विश्वनाथ महाराजांचे छायाचित्र लावलेले आहे. मंदिराच्या गर्भगृहावर वर निमुळते होत गेलेले गोलाकार शिखर आहे.